Macarıstan ictimai araşdırmalar bürosu nəhayət ki, ilk anket çalışmasını yekunlaşdırdı və qısa müddətdən sonra nəticələr açıqlandı. Araşdırmanın mövzusu belə idi: İnsanlar ölkənin keçmişini, indiki vəziyyətini və gələcəyini necə görürlər?
Nəticələrin etibarlı olması üçün büro eyni suallardan ibarət anketi fərqli statuslara malik, müxtəlif vəzifə, peşə və inancları bölüşən 2975 vətəndaşa göndərir.
Suallar aşağıdakı formada ünvanlanmışdı:
1) Hazırki rejim barədə ümumi düşüncələriniz necədir?
a) Müsbət.
b) Mənfi.
c) Nə müsbət, nə də mənfi, ancaq bir qədər inkişaf heç də pis olmazdı.
d) Mən Vyanaya köçmək istəyirəm.
2) Özünüzü cəmiyyətə yad hiss edirsinizmi?
a) Tamamilə yad hiss edirəm.
b) Demək olar ki, tamamilə yad hiss edirəm.
c) Özümü, əgər ifadə yerinə düşərsə, başdan-ayağacan yad hiss edirəm.
d) Bəzi hallarda qapıçı ilə söhbətləşirik.
3) Maraq dairəniz nələrdən ibarətdir?
a) Sinemaya, futbol qarşılaşmalarını izləməyə və barlara gedirəm.
b) Ara-sıra pəncərədən çölə boylanıram.
c) Pəncərəyə belə yaxınlaşmıram.
d) Mao Tsedunun “Balaca Qızıl Kitabı”nı bəyənmədim.
4) Fəlsəfi baxışlarınız hansı istiqamətə yönəlib?
a) Marksizm
b) Anti-marksizm
c) Elmi-fantastika
d) Alkoqolizm
Araşdırmanın nəticələri macar xalqının bəzi məqamlarda həmfikir olduğunu göstərdi:
1) Son iyirmi il ərzində Macarıstan yer üzündə mövcud cənnət guşələrdən birinə çevrilmişdi.
2) 9 nömrəli xətt üzrə işləyən marşrutun bircə dəfə belə olsun vaxtında gəlməyən sərnişin avtobuslarını nəzərə almasaq, Macarıstan hələ də yer üzündə mövcud cənnət guşələrdən biri olmaqda davam edir.
3) Əgər 9 nömrəli marşrut xətti üzrə hərəkət edən sərnişin avtobuslarının sayı artırılsa Macarıstanı olduqca parlaq gələcək gözləyir.
Tərcümə: Ramin Qasımov
