“Mücrü” nəşriyyatının təsis etdiyi “Mücrü” Ədəbiyyat Mükafatı elan etdiyi ilk müsabiqəyə – “Qarabağ Azərbaycandır” adlı qısa hekayə müsabiqəsinə əsər qəbulu başa çatdı.
Əsas məqsədi Azərbaycanın çağdaş ədəbiyyatının inkişafına təkan vermək, kitabçılığın inkişafı və Azərbaycan müəllifinin oxuculara daha da yaxından tanıdılması olan ədəbiyyat mükafatı ilk müsabiqəsində hazırda ön cəbhədə ağır döyüşlərdə böyük şücaətlər göstərən, xalqımıza hər gün zəfər sevincini yaşadan, məğrur, yenilməz Azərbaycan Ordusuna dəstək olmaq, döyüş əzminə güc qatmaq, vətənpərvərliyin təbliği missiyasını öz üzərinə götürmüşdür.
#QarabağAzərbaycandır qısa hekayə müsabiqəsinə əsərlərin qəbulu oktyabrın 7-si saat 10:00-dan etibarən başlayacaq və bir ay müddətində davam edərək noyabrın 7-si saat 10:00-da başa çatacaq.
Müsabiqənin Təşkilat Komitəsindən verilən məlumata görə əsər qəbulu 1 ay müddətində davam etmiş və 300-ə yaxın müsabiqə iştirakçısını əhəta etmişdir.
Müsabiqəyə qəbul edilən bütün qısa hekayələr Mücrü ART (www.mucru.art) portalında yayımlanıb. Noyabrın 9-dan başlayaraq Münsiflər Heyətinin 5 üzvü 5 ballıq şkala ilə bütün qısa hekayələri qiymətləndirəcəklər (maksimum 25 bal).
Müsabiqə nəticələrinin elan edilməsi noyabrın 17-də Milli Dirçəliş Gününə planlaşdırılır.
Qaliblərə qiymətli hədiyyələr və kitab dəstləri hədiyyə ediləcək. İlk 5 yeri qazanan müəlliflər diplomla təltif olunacaqdır.
Müsabiqəyə göndərilmiş əsərlərin hamısı kitab toplu halında nəşr ediləcək.
